“القشة التي قصمت ظهر البعير” .. “زرار” واحد خسر شركة 300 مليون دولار
عارف إنت لما توضب شقة مثلا وتجيب أغلى الخامات وأفضل أنواع الخشب وأحسن عفش بس تبيض المكان بلون وحش قوي ومش لايق على عفشك فيبقى رغم كل تعبك والمصاريف إللي دفعتها شقتك في الآخر “وحشة “!!
كل الجهد المبذول مش شرط يضمن نجاحك في أي شروع أو حلم عايز تحققه لأنه في تفاصيل صغيرة قوي لو مخدتش بالك منها ممكن تكون سبب فشلك أو على أقل تقدير سبب في خسارة كبيرة ليك.
خلونا نقولكوا مثال مشهور على الموضوع ده حصل سنة 2009 .. كان فيه موقع تسوق إلكتروني يعتبر تصميمه بسيط وسهل الإستخدام .. هو عبارة عن شكل عربية تسوق زي بتاعت السوبر ماركت، إنت كمستخدم بتتصفح منتجات الموقع وتحط في العربية دي كل البضاعة اللي قررت تشتريها، وتضغط بعدها على زرار “الدفع”، بس المشكلة كانت في الخطوة الأخيرة بعد الدفع، كان علشان تتقبل عملية التسوق بتاعتك لازم قبل ماتطلع من الموقع لو إنت مستخدم قديم تدخل إسمك والباسوورد بتاعتك، ولو مستخدم جديد تعملك حساب جديد ليك على الموقع بإتباع مجموعة من الخطوات.
أصحاب الموقع افترضوا إن المستخدمين القدامى هيبقوا فاكرين الإسم والباسوورد، وكمان إن الجداد مش هيكون عندهم مشكلة إنهم يفتحوا لنفسهم حساب جديد على الموقع، بس كانوا غلطانين في إفتراضهم، لأن المستخدمين القدامى مش شرط يكونوا بيدخلوا باستمرار وبالتالي كانوا كتير بينسوا الباسوورد بتاعتهم، والجداد كانوا بيكسلوا يتبعوا كل خطوات فتح حساب جديد على الموقع، وكانت النتيجة إنهم بيسيبوا عملية التسوق ومش بيكملوها ويخرجوا من الموقع.
ساعتها جه مركز اسمه “يوزر إنترفيس إنجنيرنج” يديره واحد اسمه جاريد سبول، المركز ده مهمته الأساسية دراسة مدى قابلية وسهولة الاستخدام لمواقع التجارة الإلكترونية، واكتشفوا إن المستخدمين بيحسوا بالغضب من المواقع الإلكترونية السيئة في تصميمها أو في الخطوات المطلوبة لإستخدام المواقع ده، وإن أصحاب المواقع بشكل عام كانوا بيستهينوا بالنقطة ديه، وبيشوفوا إن رغم كل حاجة المستخدم هيعرف يطلع باللي هو عايزه من الموقع.
وطبعا لأن الكلام ده مش حقيقي، بدأ المركز يدرس موقع التسوق الإلكتروني اللي بنتكلم عليه، وتوصل إلى إن الخطوة الأخيرة هي سبب إن الناس مش بتكمل تسوق على الموقع.
مركز”يوزر إنترفيس إنجنيرنج” لقى كمان إن حوالي 45٪ من المستخدمين عملوا تسجيل كذا مرة بأكتر من إيميل عشان كانوا بينسوا القديم، و10% بس من المستخدمين الجداد فتحوا حساب جديد.
ممكن ناس تشوف إن ديه أرقام قليلة، بس في موقع تسوق مبيعاته بتوصل لـ 25 مليار دولار سنويا، الأرقام البسيطة ديه تساوي أرباح بمبالغ كبيرة وضخمة.
أعاد مركز “يوزر إنترفيس إنجنيرنج” تصميم موقع التسوق الإلكتروني، وخلى الخطوة الأخيرة ديه اختيارية، وكتب رسالة بتظهر للمستخدم تعرفه إنه مش ضروري يعمل الخطوة ده عشان تتم عملية الشراء، وإنها بس خطوة مفيدة ليه لو قرر يرجع يشتري تاني من الموقع.
وكانت نتيجة التعديل ده مذهلة، ارتفعت المبيعات بنسبة 45٪ يعني حوالي 15 مليون دولار في الشهر الأول، وإجمالاً زادت المبيعات بقيمة 300 مليون دولار في السنة الأولى.
خلاصة القول إن التفاصيل الصغيرة في مشروعك أو شركتك ممكن تكون “القشة التي قصمت ظهر البعير”، يعني تبقى هي سبب الفشل، أو مصدر خسارة كبيرة ليك، زي ما تبذل مجهود ضخم في الخطوات الكبيرة لمشروعك إدي إهتمام وتركيز للتفاصيل الصغيرة كمان.
المهندس هيثم حسين رئيس مجلس إدارة شركات عمال مصر
Facebook Comments
