هاج الخاطر بالمحاين واتقشلم----وسدى همي على روس جبالي
فاض الدمع وجاه وادي متلطم----اسوادو لرسام كي جاو اقبالي

انحس ابمشعال يقدي و يفحم----في صدري بركان لابا يطفالي
اتفكرت ايام في ذاك المرسم----و حن قليبي ليه و اتقيثر حالي

تشهد ذي لرسام ياما درنا ثم----الدنيا ماتحلاش من دون غزالي
زرنها لعطاف وزهور الموسم----و انواوير ربيع في البرالخالي

قدت لي ليام و الزهر اسقم----وطلت بدري كي اسعد عطاهالي
زاهي بغزالي ما نيش انخمم----فارح بيه و دايرو وسط ادوالي

اعطاها طولة واطول امسقم----دار لها مشية كي الريم الفالي
ويلا برمت فيا عينها نتعثلم----صيادي بالسهم يرمي عن جالي

اذا ضحكت سالبتني بالمبسم----و حين انتسكت كملت واش ابقالي
مطبوعة باسنان جوهر فالفم----وكي تتكلم نغمة صوتها تحلالي

كي تتلفت صيفة البدرالا تم----جملة حارو فيه العشاق امثالي
تشبه زهراربيع مفتح وامرقم----متخالف فالنوار بلوان ازهالي

ريحتها عنبر تقدم ليه واشم----و لا مسك يفوح يشافي لعلالي
نعت القمرة تضوي ع المعلم----اعقاب الليل اتبان تسطع فالعالي

من يتمعن زينها عقلو يتقم----يبات يخمم واش يسعى من تالي
شوفتها تمرض العاشق يسقم----و يجافيه النوم كيما يصرالي

يسعد من جات في سهمو وانعم----يسكرعنها باب و سورو عالي
يحجبها ع العامة و ايقمقم----من عين الحساد ربي يحميها لي

:19:
تمت بقلمي medcherif03
:19: