إحنا بنطبق القوانين ؟!

كتب مراد منير

احنا بنطبق القوانين..!!!!

كل يوم المجلس الموقر يخترع لنا قوانين جديدة عشان بقي البلد تتقدم وتبقي احسن..

قانون بمنع تحويل الشقق في العمارات السكنية المبنية علي اساس رخصة سكني الي نشاط تجاري او اداري..

امال الشقق اللي في العمارات وعبارة عن عيادات اطباء دي كلها ايه.. العمارات سكنية.. مكاتب المحامين والمحاسبين والمكاتب الهندسية وخلافه.. العمارات سكنية.. طيب بلاش دول.. مصانع وورش بير السلم اللي منتشرة في كل مكان في مصر داخل العمارات.. والعمارات سكنية.. تعالي مثلا شوف المنطقة من ميدان العباسية وطول شارع الجيش لحد منطقة العتبة وشارع بورسعيد وباب الشعرية والمناطق دي كلها.. كل العمارات المفروض رخص سكنية.. تجد العمارة محلات من تحت طيب تمام مفيش مشكلة يمكن رخص محلات تجاري يعني.. ادخل العمارة بقي حتجد من الدور الارضي وحتي سطح العمارة كله تجاري.. ورش / مصانع / مكاتب جملة / قطاعي / مخازن.. بيخزنوا اي حاجة ممكن تتخيلها مواد سريعة الاشتعال مواد قابلة للانفجار زي بمب العيد بضائع احمال ثقيلة تؤدي لتصدع اسقف العمارة..

كل ده ايه طيب..

قالك معلش اللي عمل حاجة كده زمان وفلت مش حنكلمه.. لكن من بعد اصدار القانون.. ممنوع.. ممنوع..

ممنوع ايه بقي..

واحد عنده عمارة مثلا وعنده فيها شقة في الدور الارضي وابنه شاب خلص تعليمه بعد ما اتصرف علي تعليمه مئات الالاف.. طيب في شغل بقي.. الواد اهه متفوق وطالع من الاوائل ومعاه شهادات تخض.. يعمل ايه تاني.. المفروض يشتغل بقي.. يجد وظيفة.. في حكومة قطاع اعمال قطاع خاص اي حاجة..

لا مفيش..

الدولة بتقولك سيبك من الوظيفة اعمل مشروع صغير.. اشتغل فري لانسر.. رائد اعمال.. استغل مهاراتك وعلمك واحنا حنساعد حنديلك قروض ميسرة حنسهل لك كل حاجة.. ياللا ورينا شطارتك..

طيب هايل.. عمارة ابويا وعنده شقة في الدور الارضي وانا ممكن اعمل فيها مشروعي.. جرافيك ديزاين مثلا.. مكتب دعاية واعلان.. مكتب ديكور.. مصمم ازياء..

فيها حاجة دي…

اه طبعا فيها… ده فيها وفيها.. في قانون يمنعك تستغل الشقة السكني وتحولها لنشاط تجاري.. ياعمنا انا مش حعمل تجارة ولا بيع وشرا او محل تجاري.. ده مكتب نشاطه غير مقلق للراحة..

لا يافندم ما ينفعش..

طب العمل؟؟

العمل سيادتك تعمل تصالح مع الحي ونعمل لك معاينة ونقولك مثلا ادفع 300 الف 400 الف عشان تتصالح وتحول المكان من سكني لتجاري!!!

يعني شاب عنده افكار وحماس وعايز يبدأ مشروع صغير ممكن بعلمه وذكاؤه يكبره ويوصل للعالمية مين عارف.. وطبعا الشاب ولا لاقي وظيفة ولا عنده فلوس معندوش غير شهادته ويمكن لو والده ساعده شوية ده كمان حيصدقك ويطلب منك قرض ميسر عشان محتاج رأس مال.. تيجي انت وتقوله هات 400 الف..

اه والله هو ده اللي حاصل..

طيب ننصح الشاب ده يعمل ايه ياحكومة..

 ننصحه بأيه يامجلسنا الموقر ياللي بتتحفنا بقوانينك العجب..

انا شخصيا انصحه يجيب استاند حديد من اللي مصنوع من البوابات الحديد اللي بيسرقوها النباشين ويلبس بنطلون جينز مقطع ويخلي معاه مطوة في جيبه ويروح يجيب من اي مصنع بير سلم شوية لبس بكلام فارغ ويسرح بيهم بقي في المكان اللي يعجبه.. الرزق مضمون وزي الفل ومفيش حد حيقولك 300 الف ولا 400 ولا حتي 100

ياللا ياعم